Ырыа олоҕу кытта тэҥҥэ сайда турар норуот тыына, сомоҕолуур күүс, олох дьүөрэтэ уонна доҕуһуола. Саха ырыатын сайдыытын баай ис хоһоонноох устуоруйатын сэгэтэн көрөр эбит буоллахха, саха ырыата кэм кэрдии тэтиминэн үүнэр, сайдар, саҥаттан саҥа таһымҥа тахсар. Ырыаны иһиттэхпитинэ, үөрэммит ытыыбыт, санаабыт сайҕанар, уйулҕабыт уһуктар.

Ырыа барахсан, ырыа
Мин, ыал буолар доҕорбунуун,
Ыалдьыттыыр атаспыныын,
Ыраах, омук да дьонунуун
Ыпсаран, ситэрэн кэпсэтэр
Ырыа диэн аргыстаахпын!
Ыарыыбын да аһарынарбар,
Ыксыыр мунар да түгэммэр,
Үөрүүбүн да үллэстэрбэр,
Дьолбуттан дьоҥҥо бэрсэрбэр,
Ырааска кэрэҕэ угуйар
Ырыа диэн сирдьиттээхпин!

Баппаҕаайы нэһилиэгэр Үйэтитии сылынан ыллаан-туойан ааспыт ырыаһыт далбар хотуттарбытын ахтан-санаан ааһыаҕыҥ. Кинилэр нэһилиэк культурнай-общественнай олоҕор бэйэлэрин кылааттарын киллэрбиттэрэ, ырыа алыбар ылларан кэрэ куоластарынан көрөөччүлэр дууһаларын долгуппуттара, үөрдүбүттэрэ.